Kata Penganter:

Oemoem’nja prempoean Tionghoa, djika satoe kali ia tiroe, ia maoe melebihin dari origineel’nja (*aslinja).

Doeloe djoega. Itoe kebiasa’an boeat mengoenjah sirih dan ngemoet soesoer, prempoean Tionghoa djoega dapet dengen djalan meniroe. Tapi sedeng prempoean Indonesiēr tida begitoe besar (soesoer’nja), adalah prempoean Tionghoa tida poeas bila tida satoe kali njoesoer, ia-sedikitnja (*paling tida) ngemoet seper-ampat kati tembako. Siapa di antara pembatja jang tida pertjaja ini, dipersilahken saksiken sendiri.

Dateng sadja pada salah satoe desa. Disitoe masih bisa bahken banjak ditemoeken prempoean Tionghoa semoeanja serba koeno. Saja bilang di desa, lantaran djika dikota, prempoean Tionghoa jang begitoe soedah djarang dapet di-temoeken, lantaran boekan sadja djarang masih ngemoet soesoer jang di-tengkerem sama gigi palsoe dan gosok koelit moekanja jang kisoet dengen bekakas listrik, agar bisa kentjeng kombali.

Soepaia mengampangken pada pembatja, berikoet saja tjoba gambarken model’nja satoe prempoean Tionghoa koeno. Boeat gampang’nja kita namaken itoe type, sebage oewa Bien.

Oewa Bien tjari redjeki’nja dengen boeka toko ketjil di desa. Oewa Bien ada satoe prempoean Tionghoa radjim sekali, setiap pagi ia bangoen sebelonnja ada satoe ajam djago kloeroek (*berkokok).

Oewa Bien poenja oesia koerang-lebih 50 taon, baek ia poenja kebiasa’an, maoe poen ia poenja pakean semoea serba sederhana sadja. Saban hari orang bisa liat oewa kita pake badjoe koeroeng, kaennja djoega tida bisa dibilang terlaloe bagoes, kerna warna’nja lebih banjak mirip sama telor-tjeplok dari pada warna’nja kaen jang kita biasa liat. Djarang sekali oewa Bien pake kasoet, sebab katanja: „Orang koeno 'ndah pake kasoet, koh, ja 'ndah apa²”.

Sembari toenggoein dateng’nja pembeli, orang bisa liat bagimana oewa Bien dengen hati² dan sabar sekali masoeken ratjikan ia poenja „kinangan” kedalem satoe loempang (*alat toemboek) jang ketjil. Tida ada satoe bagian jang ketinggalan, Kapoernja, Gambirnja, sirihnja tiga lembar, pinangnja, baroe ia moelai toemboek itoe semoea. Tapi djoega ini toemboekan moesti minta dilakoeken dengen hati² kerna: „kinangan sing ke-aloesan, tjoe, 'ndah ada rasanja”

Kaloe itoe semoea aloes’nja soedah tjoekoep menoeroet-kesoekanan’nja oewa Bien, baroe ia ini moelai dengen bagian kedoea. Jaitoe lebih doeloe ia ambil sendok jang dibikin dari batok klapa; kamoedian sendok kinangan’nja. Ini pekerdja’an keliatan’nja sadja gampang sekali dilakoeken, tapi bila orang liat bagimana dengen hati² sekali oewa Bien bikin itoe semoea persediaan, baroe orang mendoesin jang sesoenggoeh’nja itoe njendok kinangan ada satoe kunst (*seni; art) jang tinggi. Sebab tida boleh sedikit sadja jang djatoh.

Sekarang dateng koetika’nja jang itoe semoea moesti di-masoeken dalem moeloet. Djoega ini bagian ada penting boeat diperhatiken. Orang djangan kira tjoema dimasoeken begitoe sadja, seperti nasi. Tida, tapi lebih doeloe moesti dilakoeken oepatjara laen.

Oewa Bien toetoep kedoea matanja, berdongak sedikit dan pentang moeloet-nja lebar, lantaran mana orang bisa liat bagimana moeloet-nja oewa Bien lebih mirip sama gowa’nja matjan jang baroe sadja oental korban’nja dari pada moeloet’nja manoesia!. (hahha karena mulutnya ini Uwa sudah berwarna merah)

Dengen di-toentoen oleh perasan’nja, oewa Bien anter itoe barang jang boleh dioempamaken sebagi……… orang jang sakit dysentrie, ke dalem moeloet’nja. Begitoe lekas lidah’nja rasaken si kinangan, begitoe lekas djoega moeka’nja oewa Bien berobah. Tadi’nja mirip sama moekanja satoe achli-pikir jang lagi pikirin satoe soal jang soelit, belakangan, sesoedahnja itoe kinangan masoek, lantas berobah sebage djoega moekanja orang jang merasa poeas sekali. Matanja terboeka lagi dengen perlahan, sementara mana moeloetnja djoega moelai bekerdja. Satoe doea menit berlaloe, didalem tempo mana orang tida denger laen soeara dari pada soearanja kinangan jang dipoeter oleh lidah dan gigi.

Sekarang dateng bedryf (*babak) jang paling penting, ja-itoe, bagian di-dalem mana sang soesoer moelai djalanken rol’nja. Sembari toenggoe dateng’nja waktoe jang

kinangan’nja soedah mateng betoel, oewa Bien poenja djeridji sementara itoe tida tinggal diem, hanja mengeremet segemgem soesoer, jang menoeroet taksiran dari satoe orang jang boekan achli, beratnja ampir seperapat kati, itoe setoempoekan tembako dengen lekas djoega berobah mendjadi satoe boetir soesoer jang besar’nja koerang lebih sebesar appel jang paling besar.

Sebelon’nja itoe moestika idoep masoek dalem gowanja, lebih doeloe oewa Bien boewang sebagian loedah sirih jang kelebihan soepaia soesoer’nja tida terlaloe besar dalem eerste stadium.

Dan…………… hap! Mendadak pipi’nja oewa Bien, jang tadinja soedah kempong, sekarang penoeh lagi, hingga moekanja mirip sama oeler jang lagi oental ajam.

Maar (*tetapi) oewa Bien poenja moeloet soedah mempoenjai routine dan techniek begitoe tinggi, hingga tentoe sadja dengen gampang ia bisa bikin-toendoek sang soesoer. Setaoe dengen tjara bagimana, tapi tida lama lagi itoe boetir soesoer di-keloearken poela dalem keada’an jang banjak lebih ketjil dari pada jang semoela.

Sesoedah’nja sisa’nja ia poenja kinangan di semboerken keloear, lantas jang soesoer di slempitken poela dan djoestroe ini soesoer jang dislempitken sesoedah’nja lebih doeloe kinangan di semprotken. Ini jang membri perasaan paling-enak, menoeroet pembilangan’nja pemoeka² dari doenia soesoer.

Dengen di-toentoen oleh djeridjinja, si soesoer berkali-kali digosokan di bibir dan sisanja gigi; kamoedian di slempitken diantara pipi bagian sebelah dalem dan goesi. Ini doea bagian dari moeloet di wadjibken boeat djepit itoe boetir soesoer begitoe keras sampe bisa keloearken aer’nja, loedah mana sebagian di telan dan sebagian lagi sebagi doebang.

Pembatja bisa liat sendiri, bagimana moeloet’nja jang menginang bisa productief, hingga bisa digoenaken oleh sembarang orang sebagi toeladan boeat perbaekin keada’an economie dan soedara’nja, sociaal.

Moeloet’nja oewa Bien bisa kasih toeladan lebih baek dari pada, oepama Henri Ford poenja tjara bekerdja jang kata’nja productief, jang bisa kasih keoentoengan.

Barangkali diantara pembatja ada jang bilang „djalannja” ini toelisan tida tetep, tida keroean jang mana ditoedjoe. Saja akoein ini, tapi saja boeat itoe meloeloe tjoema maoe tiroe sadja „djalannja satoe pengarang jang tersohor, dan jang sekarang soedah wafat, poenja toelisan jang semoea-ditjap mendjadi sekean-banjak hoofdartikels”.

Saja tanja, kaloe tangan’nja satoe sopir bisa mempoenjai perhoeboengan rapet sama economie dan sociaal, sama nasib’nja satoe negri, kenapa djoega boetir soesoer dan moeloetnja oewa Bien tida bisa (boleh) begitoe?????

Tjamboek Berdoeri Soeara Publik Sept 1925